Net ‘n kort boodskap. As jy probeer om ‘n comment te los, en dit wil nie werk nie, stuur gerus vir my ‘n e-mail by cobus.w@gmail.com. Daar is iets net lekker met die blog nie, en ek hoor hier en daar klagtes, wil net weet hoe wys verspreid die probleem is. Wil dit graag oplos voor ons die naweek waai op die Y-knot kamp.

Gepraat daarvan! Die Y-knot span kamp die naweek saam met ander Y-knot spanne by Magaliesberg. Dink asseblief aan ons in julle gebede, en ons sal julle op hoogte hou van wat gebeur.

Baie dankie aan almal wat by die byeenkoms was en aan die gesprek deelgeneem het!Wat droom ons vir ons gemeente se jeug? Wat droom ons jeug vir ons gemeente?“Prentjie-drome” is reeds deur die Y-Knot-span self asook deur lede van SOUT saamgestel. Ons sien met verwagting uit na die “prentjie-drome” van ander lede van ons gemeente, soos van die Credo-leiers by hulle voorgenome kamp 17 tot 19 Augustus. Hoe meer gemeentelede (en veral jongmense) aan die proses deelneem, hoe duideliker sal die antwoorde op die “wat droom ons”-vrae wees. Tog het die volgende duidelik na vore begin kom:

Ons kinders en jongmense droom van ‘n gemeente
- waar almal welkom voel, waar dit lekker is en waar lekker dinge gebeur;
- waarbinne geestelik groei plaasvind;
- waar gesinsbande versterk word en gesinne as geheel betrokke raak;
- waar menseverhoudings gebou word, na binne en na buite, oor kulturele en taalgrense heen;
- wat ‘n verskil in die wêreld maak en deel is van God se nuutmaakproses.Hierdie drome sluit aan by ‘n gemeente-droom wat reeds gestalte begin kry het in ‘n nuwe logo, missie-stelling en gemeente-gebed: sagte harte, helder ligte en lewende water.Die Y-Knot-droom vir ons gemeente moet nou geformuleer word sodat dit na die gemeente geneem kan word vir finalisering, goedkeuring en implementering. En by die implementering en waarmaking van hierdie droom wil ons graag ons jongmense aktief betrek.

Een en almal se insette is belangrik en waardevol. Om julle te help, plaas ons die volgende sleutelterme wat op uit die vergadering gekom het:

toerusting
voorbereiding
egtheid
uitreik
Christus se voete en hande
troos
sorg vir mekaar
opheffing van ons gemeenskap
vrede oor die toekoms
skep van geleenthede
kerk vir die hele gemeenskap

Ons hoor graag van julle.

Ek is vanoggend ingelig dat die laaste paar boodskappe nie plek gemaak het vir kommentaar nie. Ek vra verskoning, en werk aan die probleem. Hulle is nou elkeen afsonderlik reggemaak, maar ek sal probeer keer dat dit weer gebeur. Ek’s nog nie presies seker hoekom dit gebeur nie.
Maar as jy iets het om te sê, gaan gerus terug en los vir ons ‘n boodskap!
Cobus

Kobus Niewenhuis, ons jeugkomissie voorsitter, skryf hierdie oor vanaand se Y-knot byeenkoms:

Haai almal,
Vanaand, 13 Augustus om 18:00, is daar ‘n baie belangrike Y-Knot vergadering (in die konsistorie) en een en almal is welkom om saam te kom gesels. Die “prentjie”-drome wat julle tot dusver speel-speel saamgestel het, het ons probeer sorteer teen een muur van die konsistorie. Daar kom ‘n interessante boodskap na vore – ek mag verkeerd wees, maar my interpretasie daarvan sou ek so kon opsom:

“Ons droom van ‘n gemeente waar almal welkom voel, waar dit lekker is en waar lekker dinge gebeur, waar ons geestelik groei nader aan Christus, waar gesinsbande versterk word en gesinne as geheel betrokke raak, waar menseverhoudings gebou word en vriendebande gesmee word, nie net binne ons gemeente nie, maar ook na die wêreld daar buite, met gemeentelede wat werklik ‘n verskil in die wêreld (en veral in ons gemeenskap) maak bloot deur hul manier van leef: Christene wat met sagte harte God se lig en lewende water beskikbaar maak en so deel word van Sy nuutmaakproses.”
Gaan hierdie mooi droom net ‘n droom bly? Kom maak saam met ons seker dat dit ook God se droom vir ons gemeente is en of Hy nie dalk ‘n groter en nog mooier droom vir ons het nie. Kom bid saam met ons oor hoe Hy sy droom vir ons wil waar maak en waar en hoe Hy jou in die proses wil gebruik.

“Die Gees wat God ons gegee het, maak ons immers nie lafhartig nie, maar vul ons met krag en liefde en selfbeheersing” (2 Tim 1:7)

Ons bid gereeld: “Stuur ons, Heer, met sagte harte. Ons wil skyn soos ware ligte. Stuur ons, Heer, ons wil u Woord uitdra, dit laat vloei soos lewende water”. Het God al hierdie gebed van jou verhoor?
Groete en seënwense,
Kobus

Familiekerk NG Kameeldrif

Y-Knot Sistemiese Konteks Ons gemeente . . .

•           het ‘n behoorlike organigram wat alle fasette van kerk wees dek. •           se organigram maak voorsiening vir die jeug. 

•           het ‘n kleuter bediening. 

•           het ‘n ‘laerskool” kind bediening wat goed werk (Credo). 

•           het ‘n “hoërskool” kind bediening wat goed werk (Credo en Sout). 

•           het nie ‘n bediening vir ons naskoolse jeug nie. 

•           praat die gemeente leierskap (soos die Kerkraad) en die jeug leierskap nog nie gereeld met mekaar nie. 

•           is die leierskap gesetel in verskillende persone. 

•           is daar ‘n sterk fokus op die familie in al sy vorme. 

•           het die jeugbediening sy eie identiteit. 

•           neem die kerkraad die jeugbediening nie altyd ernstig op nie.

Hierdie is die eerste van’n aantal verslae wat vertel wat ons ontdek het. Lees gerus, en deel met ons wat jy dink daarvan, of wat jy dink die implikasie is van wat jy hier lees. 

Familiekerk NG Kameeldrif

 

 Y-Knot 

Fisiese Konteks

  

Ons gemeente en haar omgewing: 

•           is geleë in die Roodeplaat-omgewing, ‘n landelike gebied Noord-Oos van Pretoria wat nie swaar industrieë het nie maar wel ‘n paar winkelsentrums, asook ‘n aantal vakansie-oorde, luukse herberge en wildplase; dit sluit ook die Baviaanspoort Gevangenis in met inwonende personeel (met kinders) en ‘n afdeling vir jeugmisdadigers; infrastruktuur (paaie, water-voorsiening, krag) is relatief goed (alhoewel 23% mense daagliks hout/steenkool en kerse gebruik).

 •           die “gemiddelde” ouderdom van ons lidmate is ongeveer 37 jaar — 63% is jonger as 40 jaar en 37% is jonger as 25; minder as 10% is ouer as 65 jaar (wat ‘n weerspieëling van ons omgewing is); 

•           ons gemeentelede is hoofsaaklik Afrikaanssprekend (terwyl 29% in ons omgewing Sepedi en 27% Afrikaans as huistaal het en die meerderheid waarskynlik Afrikaans en/of Engels verstaan); 

•            lidmate is meesal finansieel onafhanklik en woon feitlik deurgaans in goeie tot luukse huise (terwyl die omgewing wissel van brandarm in plakkerskampe en agterplase tot welvarende mense in nuwe luukse landgoed (“estates”)); 

•           lidmate maak van eie motorvervoer gebruik (terwyl slegs 18% van die inwoners oor eie vervoer beskik — meeste mense woon verder as loopafstand van die kerk-kompleks af); 

•           meeste lidmate werk of studeer buite ons gemeente-grense (terwyl 14% van die omgewing se mense bo 18 werkloos is, 31% ekonomies onaktief is en die meeste van hulle wat wel in diens staan, binne ons gebied werk en ‘n baie lae inkomste ontvang); 

•           lidmate ouer as 20 beskik minstens oor ‘n matrieksertifikaat (terwyl die onderwyspeil van die omgewing ouer as 20 wissel van geen of net ‘n mate van skoling (47%) tot 7% met naskoolse kwalifikasies); 

•           gemeente-kinders woon ‘n groot verskeidenheid skole by waarvan net drie laerskole en ‘n aantal kleuterskole binne ons gemeente se grense val (terwyl ‘n groot aantal kinders (44%) in ons omgewing geen skool bywoon nie); 

•           ons Gemeente werk nou saam met ander organisasies soos kerke en die CMR (die gebied word ook bedien deur verskeie ander kerke wat die Hervormde en Gereformeerde Gemeentes insluit); 

•           ons beskik oor ‘n goedgeleë en doelmatige kerkkompleks wat in ‘n proses van modernisering en opgradering is, met genoeg ruimte vir addisionele fasiliteite — gemeentelede (insluitende ons jeug) geniet die ligging, tuine, hoofgebou en atmosfeer (by skatting het minder as helfte van die omgewing se inwoners “toegang” tot formele kerkgeboue); 

•           erediensvoorkeure van ons gemeentelede word ondervang deur ‘n gelyktydige formele en informele (of minder formele) diens (in die hoofgebou en in die saal onderskeidelik) — jonger kinders woon ‘n erediens saam met hul ouers by; 

•           die huidige fisiese opset van die NG Familiekerk Kameeldrif is tot ‘n hoë mate ‘n weerspieëling van ons gemeente se teologie. 

Laasgenoemde stelling het heelwat debat uitgelok, maar is ‘n poging om te sê . . .- dat ons teologie, soos ons fisiese opset, tans eerder gemeente-gerig as omgewings- of wêreld gerig is;- dat die veranderings aan ons fisiese opset (soos die veranderinge aan die kerkgebou en die beplande verhoudingsbou-area) verband hou met die veranderinge wat besig is om in te tree in ons teologie.     

die “gemiddelde” ouderdom van ons lidmate is ongeveer 37 jaar — 63% is jonger as 40 jaar ‘n 37% is jonger as 25; minder as 10% is ouer as 65 jaar (wat ‘n weerspieëling van ons omgewing is)

Hierdie kom uit die Y-knot verslag, en was vir my nogals interessant. Dit is ‘n totaal ander prentjie as wat ons oor die algemeen in die NG Kerk, en waarskynlik ook ander kerke, vind. Ek’s nog nie lank genoeg in die omgewing om te kan sê hoekom dit so lyk nie. Dalk wil iemand probeer help. Hoekom dink julle bly hier in ons omgewing soveel jonger mense?

Verder nog, wat dink julle sê dit vir ons oor ons jeugbediening? As amper 40% van ons gemeente onder 25 is? As 63% van ons gemeente onder 40 is? Hoe sal ons drome moet lyk in ‘n gemeente wat so lyk?

Sal graag bietjie gedagtes wil hoor.

Goed, so julle het gesê ons blog daaroor, nou blog ons:-)

Kan ek dalk net eers sê dankie aan almal wat vanaand by die vergadering was, een ding het nogals vir my uitgestaan vanaand, en dit is dat daar nog baie praat is wat voorlê! Soveel dinge wat ons nog saam moet deurdink, en oor praat, droom, en dan gaan toets. Maar dis wonderlik wanneer dit begin gebeur.

So, die jeugweek. Jeugweek is 19-22 Augustus. 19 Augustus is jeugdiens, en dan loop dit nog vir drie dae daarna. Dis werklik net om die draai, en ek is heel in die duister oor wat presies ons moet doen. Julle het klaar byvoorbeeld een van die idees vir ons duidelik gemaak dat dit nie ‘n goeie idee is nie:-)

So, Levi kom iewers, hulle het so produksie wat hulle doen, konsert tipe ding, met sing, musiek, danse ens. Tiaan het dit nog geskryf iewers laasjaar (vir die van julle wat op die skoolverwisselingskamp was, en hom nou sal ken).

Ons het gedink om iewers net ‘n lekker praise & worship tipe aand te hou, nie ‘n show nie, maar ‘n lekker saam sing-ding. Dalk Sondag?

Ek dink nou sommer, ons praat baie oor betrokke raak in ons gemeenskap, dalk sou mens iewers bietjie die stories van ons gemeenskap op ‘n tiener manier kan laat gehoor word? Foto’s van die plakkerskamp, tronk, en ander goed uit die omgewing?

As daar spesifieke mense is wat julle graag sal wil sien, ons het nou vanaand spesifiek rondom sport-sterre gepraat, maar dit kan wyer as dit ook wees, noem ook maar.

Die blog is nou al ‘n paar weke aan die gang, maar ons het eers hierdie week in die familienuus daarvan vertel, so eintlik begin ons nou maar eers. Lees gerus die vorige post om bietjie meer te hoor oor wat aangaan. Die weke wat kom is ‘n ongelooflike belangrike tyd vir ons by die Y-knot span, en ons hoop dat dit ook vir almal wat by ons jeug betrokke is ‘n belangrike tyd sal wees.

Onthou net, almal beteken werklik almal! Die jeug self (besluit jy maar self of jy nog deel is, maar dit sluit nie net ons skoolgaande jeug in nie), hulle ouers, vriende, ouma en oupa. Ook ons kategete, jeugwerkers, kerkraadslede, predikante, onderwysers… ek sou die lysie seker nog langer kon maak. Eintlik hoop ons dat dit die hele gemeente sal insluit.

Ons wil graag julle drome hoor vir ons jeug. Kom droom saam met ons in die weke wat kom.

Maar eers, kenmekaar! Los vir ons ‘n boodskap, sommer ‘n kort enetjie soos:

Hallo

Cobus

Of watookal:-) Net om te wys jy’s hier.

Besoek die blog gerus gereeld in die volgende paar weke

Jy’s nou op die Kameeldrif blog. “Blog” is die 2004 woord van die jaar gewees, en Time het gesê dat die 2006 persoon van die jaar “Jy” is, a.g.v blogs. Skielik was die persoon van die jaar nie meer net een of ander belangrike/bekende persoon nie, maar “gewone mense” wat ‘n stem gekry het deur hoofsaaklik blogs.

So, wat is ‘n blog, en wat is Y-knot, en hoe pas hierdie twee by mekaar in. Hierdie is ‘n blog. Dit is ‘n website waar jy op ‘n maklike manier goed kan skryf, wat dan van dit wat die nuuste is, tot dit wat die oudste is gepubliseer word. Meeste blogs, soos hierdie een, maak ook plek dat ander kan kommentaar los, en so deelneem aan die gesprek (jy kan hier meer lees oor blogs).

Y-knot is die Noordelike Sinode se jeug netwerk. Hier probeer ons om meer as net ‘n vinnige kursus te bied, meer as net ‘n goeie spreker wat met al die antwoorde kom. Gemeentes stap vir ‘n jaar lank ‘n pad saam, hulle dink saam, droom saam, en leer by mekaar.

Dit was sommer ‘n groot span vanuit Kameeldrif gemeente wat saam met ons die pad gestap het. En dit was mense van alle generasies. Ons het ‘n paar tieners gehad, mense in hul twenties, jong ongetroudes, ma’s, pa’s, ‘n oupa en ouma, en almal het saam gewerk en saam gedink oor Kameeldrif, en oor ons jeug.

Ons beweeg nou in die droom fase in, en wil graag nou so veel as moontlik van julle deel maak van ons gesprek. In die weke wat kom sal ons stukkie vir stukkie deel wat ons raakgesien het, en wil graag hoor wat almal dink. So volg gerus die gesprek, en neem deel. Los vir ons ‘n comment, of dit nou ‘n vraag, ‘n idee, of watookal is. Dit geld vir ons tieners, ons jong volwassenes, ma’s, pa’s, oupa’s en ouma’s. Almal is welkom!